政情：懶拉票捱鬧 陳帆搵葉劉考察補鑊
政府施政要獲得立法會議員支持，唔多唔少都要落力進行游說工作，不過間唔中都會聽到議員投訴。其中議員葉劉淑儀日前就炮轟運輸及房屋局官員平時懶拉票，仲鬧佢哋大安旨意以為政策一定獲支持。就喺尋日運房局局長陳帆就搵埋葉劉去山頂區考察，唔通係畀人鬧完拿拿聲補鑊？
以為計劃實過 被批大安旨意
事緣葉劉喺上月底就半山波老道嘅交通問題提出質詢，話嗰度啲路又狹窄、多彎同陡斜，所以多年來成日發生意外同埋交通擠塞，陳帆當時就話有關嘅道路改善工程會陸續開展。之後葉劉就鬧爆，話運房局副局長蘇偉文同政治助理符傳富冇就新界公營房屋發展工程計劃嘅文件向佢拉票，批評佢哋大安旨意，以為計劃可以暢通無阻咁通過。
可能係畀議員鬧完開始識驚，所以陳帆尋日就同葉劉視察波老道一帶，符傳富同中西區區議員楊哲安都有份添。楊哲安話過去兩年一直同局方就該處嘅交通問題開會溝通，睇得出陳帆今次係有備而來，唔係做騷喎！今次睇落補得成，但下次可能冇咁好彩，政府真係要吸取教訓喇！