中環出更：非洲出差遇大爆炸 方保僑有驚無險
有時喺同一個地方做嘢做得耐，都會想有啲新事物挑戰下，出差或者都係一個唔錯嘅體驗，不過人在異地有時都要注意安全嘅。香港資訊科技商會榮譽會長方保僑（Francis）早前喺一個講5G電訊嘅論壇上，就自爆喺外國嘅出差經歷，當時仲遇上大爆炸，搞到差啲就返唔到嚟香港添，好彩最後都平安冇事咋。
原來事緣係Francis當年大學畢業曾經喺一間貿易公司做過嘢，當時公司就派咗佢去西非尼日利亞出差，期間有一日佢喺當地一間中餐廳食食吓嘢時，就突然聽到一聲超大聲嘅爆炸聲，隨後佢一望向爆炸聲傳出嘅方向時，仲見到成地都係玻璃碎添。
當時Francis正想拿拿臨埋單走人，但點知個餐廳老闆係咁叫啲食客唔使驚，繼續食嘢得（口架）啦。事後佢先發現，原來係因為間餐廳當時裝修緊冷氣，點知就喺整整吓期間，成個冷氣分體機突然爆炸，所以先傳出爆炸聲同埋成地玻璃碎。講到咁驚嚇，Francis就話好彩個範圍唔大，所以最後都冇穿冇爛返到香港，不過食食吓嘢突然爆炸，佢都嚇到個心離一離啦。
宋振菲囡囡7歲開直播
香港今年就步入5G新時代，照計就應該先進過非洲嘅，不過就一定落後過內地台灣呢啲周邊地方啦。出席同一論壇嘅香港鐘表業總會顧問黃麗嫦（Esther）就話，睇到未來大勢所趨一定係科技嘅世界，佢哋呢輩可能唔係人人都擅長，但年輕一代就好似生出嚟就識咁，覺得大家要畀多啲機會年輕人，畀佢哋有發揮嘅機會。
中國百傑女企業家獎得主宋振菲都認同講法，面對近年唔少人都爭住開直播做KOL，佢仲話個女今年都只係7歲左右，但已經識自己開直播同網友互動，仲話第時大個想做KOL添！
卓妮