政情:麥美娟促段崇智 洗脫暴大污名

舊年6月爆發嘅修例風波至今仍未平息,中文大學更淪為衝突嘅戰場。身兼中大校董嘅議員麥美娟(Alice)早前喺立法會教育事務委員會上關注校園保安問題,尋日亦向中大校長段崇智發公開信,形容校園變成兵工廠,又提到大學嘅國際排名下跌,又對中大畢業生由舊年至今被唔少僱主或機構拒絕聘請感到痛心,希望校方能夠展現捍衞學校核心價值決心,洗脫「暴大」污名。

畢業禮變播「獨」示威

唔單止舊年爆發激烈嘅衝突,中大喺一星期前舉行網上畢業禮,當日約有100人喺校園內發起遊行,期間展示「港獨」橫額同旗幟、高叫「港獨」口號,涉嫌違反《港區國安法》,有部分人沿途以噴漆作刑事毀壞,事件由警務處國家安全處接手處理,但段崇智並冇喺錄影入面提及早前校園示威。

「博文約禮」 校訓消逝

本身係中大校友嘅Alice話由舊年年中到今年畢業禮期間,中大學生都以暴力自居,自詡為「暴大」學生,認為中大「博文約禮」嘅校訓,就好似輕煙一樣消逝於校園中,又以舊年11月發生嘅中大衝突事件為例,批評有學生佔領二號橋堵塞吐露港公路,部分學生聯同校外人士大肆破壞校園,運入來源不明嘅物料製作汽油彈,將校園變成兵工廠,對中大沒有半點憐惜,佢話自己更重視嘅係師弟同師妹嘅心,當中用乜嘢手法追求公義同理想係關鍵所在。

Alice認為校訓裏面嘅「博文」唔單止代表學科上嘅知識,亦包括對世界嘅認知,但佢見到唔少學弟同學妹,喺政治風暴中深陷漩渦,甚至用謊言同暴力,演繹別人灌輸嘅口號式信念,失去獨立思考嘅能力同純真嘅心智。佢又話作為中大人必須盡全力扭轉局面,挽回社會對中大嘅信心,改變市民對中大嘅負面印象,秉持創校學者一直以來以育人為本嘅信念,培養學生「博文約禮」的精神,全心全意捍衞中大校譽,盡心盡力洗脫「暴大」污名。

鑑於疫情惡化,中大校友日尋日改為網上直播進行,但不設問答交流環節。段崇智喺預先錄製嘅歡迎詞中話大學正制訂未來5年策略計劃,其中「凝聚校友和大學拓展」嘅計劃係重要一環,又強調中大要繼續保持創新同進步,期望繼續團結校友力量,提供更優質嘅教育同研究,增強中大嘅國際影響力同地位。但歡迎詞中並無提及早前校園示威。

第一手消息請下載on.cc東網iPhone/iPad/Android/Windows Phone Apps