政情：容海恩轟網上調解平台乏宣傳
話說立法會司法及法律事務委員會尋日開會，討論政府支持嘅網上爭議解決同促成交易平台嘅最新進展，建議為非政府機構一邦國際網上仲調中心提供一筆過一億元嘅撥款，用嚟支持網上爭議解決及交易平台（eBRAM平台）嘅發展、提升同初期運作，但有議員批評平台宣傳工作做得唔夠，延誤市民搵法律援助機會。
延誤市民搵法援
本身係大律師嘅議員容海恩（Eunice）自爆係中心其中一名調解員，但獲聘咁耐以嚟只係出席咗一次課堂後，就冇後續工作，批評計劃宣傳力度不足，好多市民唔知道有呢個計劃，延誤咗搵法援嘅機會，質疑呢個計劃點樣幫市民？保險界議員陳健波就話絕對支持計劃，但佢認為涉及較大金額的公帑，中心點樣確保服務物有所值？
一邦國際網上仲調中心董事會主席蘇紹聰話中心喺6月至7月主要係培訓調解員同仲裁員，仲有強化網絡安全性同私隱要求，佢承諾中心未來會專注宣傳同推廣工作。佢又話中心設有委員會監管技術發展，成員包括兩個總監同外聘專才，政府會有嚴格系統監察服務，中心亦會嚴格跟進，確保公帑用得其所。