中環出更：曾被起底 黃繼兒斥如恐嚇
已卸任嘅前個人資料私隱專員黃繼兒（Stephen）對半年前遭網民「起底」一事，至今仍相當不齒。近日Stephen出席一個網上對談節目，期間佢形容事件不單止針對佢個人，就連子女嘅名字同出生日期都被公開，拖累到家人都受到騷擾，生活大受影響。
Stephen憶起今年5月立法會保安因阻止泛民議員衝擊而被「起底」，佢強烈譴責呢個不當行為，估唔到自己後來亦同受攻擊。佢又話社會上好多唔同派別嘅人士都相繼「中招」，又痛斥此等劣行係帶有恐嚇成分咁話。
注重紀律 仍參與童軍會務
講完令人氣憤嘅事，Stephen就提及以往嘅童軍生活，話透過參與群體活動，培養正確價值觀同紀律，學識幫助同尊重別人，就算依家年紀大咗，仍有參與童軍會務。佢又記得廿幾年前，某晚深夜帶隊去八仙嶺行夜山，途中錯過路標無法判斷落山方向，當時佢覺得只要向住有光嘅方向行就唔會錯，點知最後成班人行錯路去咗深圳，最後要搵人揸車載佢哋走。
卓妮