未選已使幾百萬 申報當成提款機

新一屆區議會誕生以來,由於一片黃絲當道,佢哋不但喺議會上撐暴仇警,一眾攬炒派甚至將被捕當政績,以為咁樣會有政治光環。可以話區議會已經變質變味,已經唔係主力為地區服務!

呢,據不完全統計,今年已有逾60名黃絲區議員干犯不同罪名而被捕或被控,佢哋可謂不務正業,民生問題放一邊,煽風點火博出鏡,把所謂抗爭帶入區議會,令服務社區嘅功能名存實亡。嗱,最新又有一單「傑作」喇!警方商業罪案調查科尋日展開拘捕行動,以涉嫌串謀詐騙,拘捕元朗區議員王百羽、九龍城區議員李軒朗及公司「U Made This」前董事陳梓謙。警方表示3人被捕與原定9月舉行嘅立法會換屆選舉開支有關。

據了解,王百羽及李軒朗參選俗稱「超級區議會」嘅議席時,所申報嘅選舉開支有誇大成分,包括嗰間「U Made This」公司所提供嘅服務收費誇到離晒大譜。早前選舉事務處公開各立法會參選人嘅選舉開支申報,「超級區議會」開支上限由上屆693.6萬元增至760.2萬元,點知有人飛擒大咬,王百羽團隊約489萬元嘅選舉開支,達上限64%,冠絕同一界別嘅參選人。

阿哥,原來當中包括形象指導20萬元,撰寫講稿50萬元,攝影又再50萬元!喂,漢奸黎嘅助手Mark Simon委託人撰寫抹黑拜登大選嘅文稿,都係10,000美元咁大把咋,依家寫篇講稿都收50萬個大洋,原來一字真係可以值千金,羨煞香港一班爬格子動物矣!

攝影又邊位大師揸機吖?50萬影到大笨象都會飛啦!形象顧問貴到飛起,唔通執完之後真係豬扒都變和牛?錢多人傻都唔係咁使啩?呢兩位區議員,如果唔係王八蛋存心掠水,就係幾百萬未開頭!而嗰間「U Made This」公司提供嘅服務,喺支出嘅489萬元中,獨佔逾450萬元,呢位當時身兼創作總監嘅陳梓謙,睇嚟一啲都唔謙,功夫茶建議佢公司改名「深水潛艇」,食水深也!依家未選都狂花近500萬元,將申報開支制度當成提款機,果然江山代有「財」人出!

仲有啊,警方喺其中一名被捕人士住所搜出大量仿製武器,包括8支仿製長槍、17支仿製手槍、仿製彈藥及一把木弓,故將加控該名人士一條管有仿製火器及彈藥罪。消息指,呢位人士就係王百羽!身為區議員,佢都算多「財」多「藝」,睇嚟做一個區議員實在大材小用。

喂,區議會中「臥虎藏龍」當真不少,政府好應該深入調查,否則錢多人傻做咗提款機事小,養虎遺患搞到治安不靖先至大鑊!一陣開開吓會,有人攞支槍出嚟亂咁舞就唔好喇!