政情：公民講場：強積金政府拒重視 打工仔遭殃愈供愈蝕

為應付打工仔退休後嘅生活開支，本港實行僱主與僱員共同供款嘅強積金制度。儘管有不同風險程度嘅投資組合供僱員選擇，不過一般打工仔既欠缺金融知識，又冇時間緊貼市場動向，結果傾向選擇風險較低嘅強積金產品。然而有工會調查指出，大部分較低風險嘅強積金產品，過去廿年都跑輸通脹，咁就難怪坊間質疑強積金成效嘅聲音，愈來愈強烈。財經事務及庫務局局長許正宇真係要正視問題，諗下辦法點樣確保打工仔嘅供款不被通脹蠶食，否則長期供款等如持續蝕錢，仲邊有人相信強積金制度呢？