政情：改歌諷刺校長 城大生遭禁足校園
香港城市大學疑有學生因翻唱及發布二創歌曲《找郭位》MV諷刺校長，被指違反學生紀律守則，涉事學生到紀律調查小組應訊後被裁定指控成立，遭校方處分。消息指該學生唔單止被書面譴責並保留紀錄，更要寫道歉信，同埋夏季學期被禁止踏足校園。城大發表聲明，指紀律委員會從未對外公布個案詳情，而校長對事件不知情。
書面譴責 另須寫道歉信
嗰名城大生上年11月底喺網上發布《找郭位》MV，改編自流行曲《開學禮》，歌詞提及上年社會事件中，警方一度喺城大校園放催淚彈，校長郭位竟然病假缺席、無作為，又形容城大係「學店」、「染紅」同「為人民幣」等。
城大學生會就批評大學唔應該以「保護聲譽」之名，損害學生嘅言論自由，亦唔應該就同學二次創作或使用校歌、校徽作批評或表達不滿而實施任何處分。
城大發表嚴正聲明，未明個別媒體嘅消息從何而來？又重申校長至今不曾過問、甚至並不知情。聲明又指大學師生應遵守校規，以和平、理性的原則表達意見，而城大對於有社會人士和學生惡搞校園、散播失實指控，混淆程序公義，感到極度失望同不滿。