政情:「安心出行」料使用率低 搞好健康碼仲實際

粵港澳「健康碼」互認機制遲遲都未落實。立法會資訊科技及廣播事務委員會尋日開會,討論政府應用資訊科技應對疫情,期間有議員關注政府即將推出嘅「安心出行」流動應用程式只係自願性使用性質,憂慮使用率低,又批評政府過去所做嘅防疫措施「畏首畏尾」,要求政府喺推行粵港澳「健康碼」同有關應用程式嘅同時,準備定屬於香港內部使用嘅「健康碼」,以應對下一波疫情喎。

政府資訊科技總監辦公室將於本月中推出「安心出行」流動應用程式,市民可以透過掃描張貼喺特定場所入口位置嘅二維碼,記錄出行紀錄。如場所出現感染個案,應用程式就會向曾於相若時間到訪同一場所嘅用戶發出通知。

議員斥港府措施畏首畏尾

之不過,呢個應用程式都只係以自願形式供大眾使用,成效係點就真係惹來質疑。議員葛珮帆喺會上發言話,市民都希望本港確診數字盡快清零及重新通關,冀內地嘅經濟「內循環」可帶動本港經濟,但係依家政府提出嘅措施「畏首畏尾」。葛擔心,如果「安心出行」流動應用程式使用率低,未必能做到內地「健康碼」嘅成效,所以促請局方參考內地做法,準備只屬香港內部使用嘅「健康碼」,若出現新一波疫情政府就可以推行強制性措施。

記錄出行靠自律 成效惹疑

資訊科技界議員莫乃光就認為,如果市民將來去唔同嘅場所都要用「健康碼」,恐怕會惹來私隱問題。莫又關注政府未來推出嘅「健康碼」是否單純作為出入境用途,抑或會限制市民喺社區內自由出行。

創新及科技局副局長鍾偉強回應時就只係強調,當局為準備「安心出行」流動應用程式,正聯絡不同處所或的士營運商加強追蹤,同時亦會加強防疫工作。對於「健康碼」未來嘅用途,鍾只引述該局嘅局長薛永恒之前嘅說話,指推出「健康碼」只會作過關用途。但係莫乃光多次追問「健康碼」只作過關用途,係屬於局方嘅構想,抑或成個政府嘅共識時,鍾偉強一味迴避問題同埋反覆咁話「呢個係我哋立場」。

至於金融界議員陳振英就問及,點解喺最高危嘅公共交通工具中毋須張貼應用程式二維碼,但食肆、街市及運動場地就要呢?政府資訊科技總監林偉喬解釋話,希望喺所有政府場地都可以張貼,而街市作為政府場地,盼做法可鼓勵其他私人場地參與張貼二維碼計劃。至於計劃未有涵蓋地鐵及巴士,皆因衞生署認為市民乘搭公共交通工具期間唔會貿然脫下口罩。

另外議員黃碧雲亦關注到,至今約有39萬人曾佩戴檢疫手環,當中有幾多人曾涉及違規,例如脫下手環外出用膳。林偉喬回應指每月約有幾十宗違規個案,會通知衞生署跟進及處理。

第一手消息請下載on.cc東網iPhone/iPad/Android/Windows Phone Apps