香港鼠患嚴重，區區都叫救命，油尖旺區議會食物環境衞生及工務委員會尋日開會，講到大角咀南區及富榮區鼠患又群情洶湧，佢哋批評食物環境衞生署滅鼠不力，冇章法兼冇招數，期間有區議員動議用催淚彈滅鼠，仲要係零反對下獲得通過。一粒催淚彈成本高達500港元，真係殺雞用牛刀，點解唔建議用手榴彈呢？
班區議員就鼠患問題展開討論，指出依家啲老鼠識遷徙及爬渠入屋，已經波及到其他地區市民，就連空置單位、垃圾房及建築工地等亦成為老鼠溫床，希望食環署真係能夠解決問題。講講吓，班泛民區議員仲話，鑑於去年鼠患問題並不嚴重，覺得係去年因反修例示威發放的催淚彈「成功滅鼠」，仲動議研究催淚彈成分如何在對人體無害情況下滅鼠，議案更喺大比數贊成下獲得通過。
呢個嚇人一驚又創意無窮的建議一出，我哋即刻翻查資料，原來催淚彈每粒成本高達500港元，用嚟滅鼠完全係浪費資源，簡直係廢噏當秘笈。
對於佢哋嘅動議，食環署旺角區環境衞生總監林君厚唔知點答好，只係話署方已開展目標小區滅鼠行動，未來亦會分階段在全港後巷等黑點放置紅外線攝影鏡頭以監測老鼠行蹤，然後釐定滅鼠策略，從「食、住、行」三方面對付老鼠，如堵塞鼠洞、投放藥餌及捕鼠籠等。對於私人屋苑，食環署會提供技術指導及提供滅鼠藥等。