政情：評分大跌 楊岳橋衰到貼地 民建聯工聯會包尾

香港民意研究所喺今年10月中旬就10大政治團體同5大立法會議員民望進行民意調查，分別訪問咗504同510名港人。結果顯示，民主黨同公民黨評分分別下跌0.4分同0.1分，分別跌至42.5分同39.3分；建制派民望亦大幅下跌，民建聯同工聯會同得27.4分，分別比上次調查下跌7.8分同4.6分，喺眾多政黨中得分最低。至於議員方面，AY獲得44.8分，但因認知率只有78.4%，不足以躋身5大立法會議員排名榜。

泛民拉布伎倆失民心

依家泛民主派喺立法會大會度不斷重施故技，以點法定人數嚟拉布，導致兩周內大會兩次流會，更被建制派揶揄泛民拉布僅為證明有剩餘價值，民主黨同公民黨民望下跌係咪因為拉布呢啲伎倆已不得民心？而民建聯民望咁低，做主席嘅李慧琼有冇諗過係乜嘢原因？身兼工聯會副會長嘅議員黃國健，又有冇計挽回民望？

建制疫下未挽回經濟

香港教育大學社會科學系講師吳凱宇認為，調查反映市民對立法會議員決定延任露出端倪，港人希望留任嘅民主派議員可以喺議會加大競爭力度，但結果卻未如理想，表現唔能夠得到市民認同，甚至質疑抗爭意志薄弱，唔能夠成功當選立法會各個事務委員會正副主席就係最佳例子，佢認為民主派應該要好好諗要點樣利用議會呢個平台去連結社區。

至於建制派方面，吳凱宇點名話民建聯同工聯會兩大黨評分下跌，反映咗建制派支持者內部對建制派嘅不滿加劇，特別係疫情對經濟打擊相當嚴重，而建制派一直標榜住自己比民主派更重視民生議題，但佢認為成效似乎冇乜作用。