中環出更：改《內務守則》杜絕拉布 料年底前完成修正案
立法會尋日召開議事規則委員會，討論修改《內務守則》，擬進一步防止泛民議員在議會拉布。委員會主席謝偉俊就話，方向性通過張國鈞嘅議案，按照慣例將會使用兩星期時間諮詢全體議員嘅意見，然後召開會議檢視行文後，再交付內務委員會，預計年底前完成所有修正案。
民主派死撐話冇必要
會後泛民批評修改冇必要。委員會副主席梁繼昌表示建制派包辦18個事務委員會後，仍喺議事規則委員會上提出3個荒謬改動，包括限時選舉主席、限制就附屬法例嘅發言時間，同埋將專責委員會議案排喺議員議案之後。佢話民主派喺議會屬少數，呢次修改《內務守則》將令民主派更難監察政府。法律界議員郭榮鏗對建制派修改《內務守則》表示不解，另一議員楊岳橋就話修改將令議會功能弱化，批評建制派只顧效率不顧辯論。
建制派議員張國鈞話過去民主派一直濫用議事規則，認為修改《內務守則》可堵塞漏洞。佢又話今次修改可避免泛民議員濫用提名程序癱瘓立法會，亦可讓議員有機會提出議員議案。
議員梁美芬認為今次只係稍作修改，盼議員善用議會時間，切勿浪費時間喺處理程序方面。議員陳克勤認為修改後任何人仍可參選委員會正副主席，並冇削減議會職能，反而另一方面可繼續推動議員議案。
卓妮