中環出更：寸金尺土逼住趕工 歐陽明詩：港起樓全球最快
香港出名生活節奏非常急促，連行步路都快過人。起樓固然係大工程，但建築師歐陽明詩就話香港做建築係全世界最高效率，因為寸金尺土，而人工同材料費用都非常昂貴，所以都逼住要趕工，不過早已習慣呢種模式，保持高效率嘅同時，都絕對可以交出好貨。
卓妮早前出席由香港建築師學會主辦嘅建築展覽「島與半島」，歐陽明詩係其中一位策展人，佢話建築唔單單係佢嘅職業，仲係生活不可分割嘅一部分，講到去世界各地遊覽嗰陣，相簿中出現得最多嘅唔係美食或個人相，而係「美景」，每次旅行都會預留時間欣賞建築物，仲會專程揸好耐車去睇建築物，話同行嘅屋企人都早已習慣，唔會介意一齊靜心欣賞。
張海活：大館成中環「文藝心臟」
香港有好多具歷史意義嘅建築物，理工大學社會科學、人文及設計學部副主任張海活（Howard）話，近年多咗好多建築師關注呢個議題，有建築師更加係專注喺文化保育方面，亦成立專門嘅學會，令更多人明白歷史建築對於城市記憶同發展係不可或缺嘅一部分，認為保育同城市發展絕對可以相輔相成。Howard提到中環大館係一個成功例子，將原本已丟棄嘅舊中區警署，搖身一變成為中環嘅「文藝心臟」。佢認為政府應向發展商提供更多誘因，令佢哋明白活化唔單止可配合城市發展步伐，佢哋亦可從中得益。
聯合總策展人、建築師蘇國堅話香港建築有獨一無二嘅特徵，由於曾經係殖民地，成為中西文化嘅大熔爐，建築物比較多元化，同時變遷較快，好容易隨潮流而消逝。香港嘅人口同建築都非常密集，例如喺旺角街頭行，會有種雜亂嘅感覺，但神奇之處係亂中有序，整座城市仍然好有秩序咁運行，而每樣事物存在嘅背後都有一套規矩。佢又講到香港人特別追求「魅力」，認為香港嘅魅力唔止係嚟自奢華嘅物質生活，亦在於香港嘅獨特面貌，例如山勢同海岸。
卓妮