上海仔頭馬金融趙冇料爭坐館 被阿頭爆粗辱罵扮死狗

頭耷耷不斷重複「我好尊重你」

網上昨日流傳片段，長約1分50秒，ETB與金融趙在一間夜店房間內，期間ETB一邊講手機，一邊以粗口辱罵金融趙等人，稱「全部你嗰10幾人，你（金融趙）話?（你話事，你話事），邊×個？你同邊×個傾呀？我喺唔喺度呀？×你老母×，你係咪替我呀？講乜×嘢？有乜好講？×你老母×，比×晒位你，×你老母×，你咪搞×掂佢囉，你玩×晒？收線啦！」

金融趙被辱罵至頭耷耷扮死狗，認真冇面。

「上海仔」郭永鴻

金融趙「死晒狗」指：「阿頭（ETB），你識我咁耐，我係咪啲咁嘅人先？我素來好尊重你，（一件事，你做乜×嘢上台呀？）都唔到我話事，（咁你出嚟講乜×嘢？）我幾時有講過嘢呀，阿頭，你係阿頭，你話事，我素來都好尊重你，問心講你話係咪先（你唔好同我講呢啲嘢，你問吓點×樣？）。」

金融趙繼續「扮死狗」，重複指：「阿頭，我素來都好尊重你，你點話咪點話囉，點輪到我話事？其實我根本係卒仔嚟之嘛！阿頭，你話OK咪OK囉，你話唔OK咪唔OK囉。（依家你哋話事呀?你上台做乜×嘢？）咁你問番佢哋，（×你老母××），阿頭你想我點幫手？（使×你幫手！）你想我點配合？（使乜你配合！我話畀你哋聽，唔係你哋話×晒事嘅）。阿頭，我知唔係我哋話事！」接着ETB即拿起袋，然後說「行街，行街，走」，便拂袖離開，片段結束。

上海仔窮途末路 無力左右選舉

現年43歲的「金融趙」原名趙俊名，是金融界「老千」，以倫敦金騙局起家，曾三度涉及騙案入獄。消息稱，他多年前有一筆數由黑幫和勝和綽號「肥堅」出面「拆掂」，於是加入和勝和，跟隨上海仔郭永鴻。去年是和勝和選舉年，由於上次2016年換屆時，該幫會曾因選兩個還是3個坐館而「鬼打鬼」，結果一輪腥風血雨後，才由綽號ETB、「寸仔」及「阿祖」3人成為坐館。3年後再度選坐館，金融趙「放晒風」要力爭做坐館，惟因聲名狼藉最終落選，由綽號「志權」及「少韓」二人當選。據了解，金融趙落選主要是出身問題，加上上海仔已窮途末路，無力左右選舉。

消息指，金融趙曾三度入獄，惟之後利用其爪牙作為替死鬼。警方有組織罪案及三合會調查科前年採取打擊有組織倫敦金詐騙案的「高越」臥底行動，揭發有詐騙集團透過不同社交媒體例如WeChat等，吸納來自香港、內地、台灣、新加坡及馬來西亞等投資者，警方在掌握公司的運作及犯罪模式後，派臥底混入集團當經紀搜證。行動中有54人被捕，據悉多人為趙的爪牙，而趙則走法律罅「甩身」。