政情:防泛民玩嘢 建制倒水式入選規委員會

政府早前根據《緊急情況(換屆選舉日期)(第七屆立法會)規例》將原定於今年9月6日舉行嘅選舉押後一年至出年9月5日舉行。由於規例屬於「先訂立後審議」,相關規例嘅小組委員會亦都因而成立,諮詢議員嘅意見同審議,今日就會召開首次會議選舉正副主席,無論建制派同民主派都冧友落去,委員會現時共有45位委員,究竟要爭取啲咩呢?

傳張國鈞出選主席

建制派喺委員會入面佔30人,而民主派就佔15人,建制較民主派多一倍人數。點解建制派要派咁多人加入委員會?有建制中人話因為擔心一旦民主派取得主席一職,就會「玩嘢」,分分鐘改到條規例好混亂,所以建制派先要倒水式加入委員會,幫手「睇住個場」,仲透露可能會提名議員張國鈞出選主席。據悉,民主派未討論部署同提名邊個擔任主席,但就話會準時出席會議嘅。

政府根據《緊急情況(換屆選舉日期)(第七屆立法會)規例》由行政長官會同行政會議根據《緊急情況規例條例》(第241章)第二條訂立,以落實押後選舉日期嘅決定,《規例》亦會終止相關選舉程序,以及處理各項相關同相應事宜,包括選舉開支同選舉捐贈。

第一手消息請下載on.cc東網iPhone/iPad/Android/Windows Phone Apps