中環出更：10年遞增勞工假嫌耐 陳健波獻計
近日有消息指政府有意用十年時間，逐步增加勞工假至十七日，平均每兩年就會增加一日，但係有人就批評十年時間太耐，保險界議員陳健波（波哥）就提議政府成立基金，由政府注資，咁就可以即刻實施有關嘅措施，話肯定可化解怨氣喎。
成立基金政府注資 可即時實施
政府估計目前全港有一百萬個打工仔只得十二日勞工假，波哥話佢早喺○九年就開始向特首爭取將勞工假期加多五日，同公眾假期睇齊，今次呢個傳聞一出爐，就引嚟好多打工仔嘅抨擊，話十年時間太耐，雖然波哥話政府肯做係好事，加上額外費用由僱主承擔嘅，但係點先可以縮短時間呢？
佢話要成立基金，由政府注資，就可以即時實施呢個措施，絕對唔使等十年，遲啲先由僱主承擔番。
波哥又話勞工及福利局曾經喺一五年進行調查，如果一百萬個打工仔放多五日假，以一九年嘅工資計算，總成本係廿三億元，假如政府主動承擔同資助廿三億元，一百萬個打工仔就可以放多五日假，佢認為只要政府肯拎廿三億元出嚟，可以令幾十萬個家庭生活過得開心啲，肯定有助化解社會怨氣。
佢又提到措施落實後，政府可以同資方商討，每年逐步減少資助額，十年後完全唔使資助，佢覺得呢個係兩全其美嘅方法。
卓妮