政情：西貢泛民區議員缺席 工作小組流會
西貢區議會文化、歷史及體育工作小組日前召開會議，時間安排喺早上九時三十分。但點知，為數十六人、全部都係民主派區議員嘅工作小組，最終唔夠法定人數流會。儘管後來有繼續開會，但就並非法定會議。同為民主派嘅小組召集人梁衍忻都忍唔住鬧爆，缺席議員唔尊重民間團體，未有履行議員職責，唔工作，做咩又入工作小組？事後更於Facebook貼文，慨嘆西貢區議會對上一次流會，係一五年交通及運輸委員會會議！
《會議常規》列明，常設工作小組法定人數，為不少於該工作小組全體成員人數嘅三分之一，即至少要有六人先至可召開會議，冇足夠人數時，主席須指示秘書召喚缺席議員出席，如十五分鐘後仍未夠人，就要宣布流會。但當日會議開始時，會議室都只得梁衍忻、黎銘澤、黎煒棠、呂文光及鍾錦麟五人。喺區議會秘書及助理專員不斷致電催促下，余浚寧先至姍姍來遲，以為終於夠人開會，惟時限已過。至於其他議員若非告假，就係中途先出現，有啲人甚至全程都杳無蹤影。
召集人轟唔做嘢應退出
梁衍忻強調唔係攻擊同路人，事件同政治立場無關，完全係議員紀律問題，坦言工作小組並非強制參加，如果覺得區務重要啲而唔開會，點解唔退出呢？入得嚟就應該要做嘢咁話。