政情：過大海免檢疫 陳恒鑌有古講
唔少舊式唐樓都係俗稱嘅「三無大廈」，即係冇業主立案法團、居民組織同埋冇聘用物業管理公司，通常大廈嘅衞生都比較差。議員陳恒鑌（Ben）就喺澳門拍片話，香港應該參考澳門用壓縮垃圾桶，方便喺三無大廈收集垃圾。但點解疫情咁嚴重，Ben都去到澳門，仲要唔使強制隔離呢？
3年前考察 依家再講解
原來，Ben冇去到澳門，條片係三年前拍嘅，之不過港府最近喺荃灣擺放咗幾部壓縮垃圾桶，所以先講解番啫。佢喺影片中話，澳門嘅壓縮垃圾桶等同於香港九個垃圾桶，壓縮垃圾仲可以節省空間，希望港府都可以參考。
咁港府推行壓縮垃圾桶嘅進度如何呢？其後我哋問番Ben，佢話香港嘅垃圾收集系統一直都好有問題，舉例話鄉郊根本冇地方擺咁多垃圾桶，更加唔方便清潔人員去收集垃圾，不如擺幾部壓縮垃圾桶，等市民自行去揼垃圾仲好啦。佢又話雖然香港都開始擺放壓縮垃圾桶，但澳門嘅有排水口，一來可以避免鼠患問題，二來仲可以避免臭味嘅產生添。睇嚟港府都要繼續加緊改善垃圾收集系統喇。