中環出更：馮慕至籲糖尿病人勿矯枉過正
新冠肺炎雖然係全球醫療嘅頭號威脅，但其他疾病例如糖尿病都不容忽視。患上糖尿病少不免要注意飲食，但唔少病人對此若非矯枉過正，就係存有謬誤，明愛專上學院健康科學院副院長馮慕至，話見過病人刻意避免攝取鹽分，最後因為缺鈉而要入醫院添啊！
卓妮早前去咗獅子會同明愛專上學院設置糖尿病服務站嘅簽署合作備忘錄儀式，馮慕至分享曾經遇到有啲糖尿病人用「奇招」控制飲食，例如堅持食隔夜飯，深信可以減少糖分攝取，又有病人用聲稱可以減少糖分嘅電飯煲，但呢啲似乎都缺乏科學根據。馮又講到照顧者往往喺無意之間，為病人平添不少壓力，病人會覺得咩都唔可以食，非常困擾，索性捱餓添啊。
麥建華：疫下食多咗零食
明愛專上學院校長麥建華就比較着重運動，每日都會勤力健身。佢話自己冇六嚿「朱古力」，但自己就好鍾意食朱古力同雪糕喇，特別喺疫情之下留喺屋企時間多咗，又成日去超級市場補充日常用品，成日手多多買零食。不過麥建華話食嗰陣就唔會諗太多，要享受當下、唔好後悔先對得住啲美食，認為凡事皆諸多設限唔會食得開心，仲可能會適得其反地「破戒」，但食完就要記得更勤力做運動補數喇。
國際獅子總會中國港澳三○三區總監梁禮賢就提到，自己父母都係糖尿病患者，身為醫生嘅佢理應可以提供好多專業意見，然而父母總有「食鹽多過你食米」嘅觀念，始終比較固執，好難督促佢哋飲食。不過梁禮賢講到，幸好老人家食量較少，都有助緩減病情。梁話自己平時都會注重飲食，避免「三高」，雖然係老生常談，但勝在任何時候都適用。梁禮賢話自己平日工作繁忙，仲試過一日內參與七項服務，成日冇時間食嘢，但就話唔知點解咁都唔瘦，對此百思不得其解。
卓妮