中環出更：着醫院衫似足病人 陳沛然惹中招疑雲
本港近日爆發第四波疫情，確診個案有所回升，令市民人心惶惶。醫學界議員陳沛然（Pierre）尋日下晝喺Facebook上載咗張相，相中佢着住一身醫院病人衫，一臉憔悴咁嘅樣，唔通佢中招？
教書兼客串演員
Pierre就喺貼文中寫住：「不用擔心，今日去教書，兼職做演員。」哦，原來佢唔係染疫，亦唔係有啲咩病痛，之不過，佢扮得咁神似，又難怪令人誤會嘅。唔少網民都紛紛喺貼文下留言，話：「嚇死人咩，扮得咁似！」亦都有網友大讚Pierre：「連啲頭髮都有戲！」睇嚟Pierre都幾有表演天分，唔知佢有冇打算發展呢方面嘅興趣呢？
查實立法會早前都發生過「爆疫驚魂」，話說喺今年七月中，當時仍然係議員嘅陳淑莊，佢嘅辦事處有一名議員助理嘅家人染疫，令到同層唔少議員都提心吊膽；去到八月初，有政黨總部所在嘅大廈亦有人染疫，亦都令政界議論紛紛；而日前亦有幾名高官同議員欣賞過染疫樂手嘅表演添！
卓妮