中環出更：深圳創科勝香港？業界勉年輕人外闖
成日都有人話香港搞創科好難，近日亦有意見指香港就嚟畀深圳爬過頭，第日喺創科上嘅發展更係遠勝香港、坐穩龍頭地位。卓妮日前去咗個講創科嘅論壇，仲見到啲中港兩地搞創科嘅業內人士，聽佢哋嘅經驗之談分享，睇嚟香港要喺全世界都搞創科嘅環境下突破重圍，都難免要跳出舒適圈，勇敢闖出去，唔好成日畀成熟嘅社會體系箍住呀！
究竟深圳係咪真係會超越香港？相信呢個問題都係大家近排茶餘飯後嘅話題，而博士智庫研究院主席及環球商業協會主席黃仲良（Sunny）就認為，香港始終喺同國際接軌嘅地位上佔優勢，覺得想做創科嘅年輕人要好好利用呢一點，再運用內地對於創科產業提供嘅啟動基金、租金補貼等優惠政策互補，咁就唔怕搵唔到人生第一桶金。
同場仲有博士智庫研究院榮譽主席、教育局前局長吳克儉，佢就覺得香港要搞好創科，最重要都係互補。佢話港深兩地政府可以喺政策上增加多啲靈活性，而年輕人都要肯出去闖同擴闊思維、放下成見，否則世界喺度變緊，香港唔變就追唔上世界嘅步伐喇！
至於曾經做過投資人、依家喺一間科技公司做策略總監嘅柯晉譽就話，以佢經驗嚟睇，香港嘅創科產業搞咗咁多年都搞唔起，主要係成個香港社會都發展得太成熟，生意人見現有嘅模式都仲賺到錢，就唔想去博，亦唔願意投資一個高風險嘅產品，導致依家故步自封、落後於人嘅局面囉。
邵志堯倡改變固有思維
雲端與流動運算專業人士協會數字經濟委員會主席邵志堯都係咁講，香港喺創科產業上要尋求突破，首要就係改變固有思維，不停因應世界潮流靈活變通，唔好怕變化就拒絕接觸新事物咁話。而柯同邵都認為本港年輕人喺本地做研發冇問題，但講到將新科技變成賺錢嘅商品，就要勇敢闖出去，將產品推向內地同國際市場。
卓妮