政情：曾坐監停學 黃之鋒讀6年大學先畢業

自爆喺收押所考試

黃之鋒喺Facebook貼文，話尋日收到公大學分承認同畢業組來信，確認佢已完成社會科學學士（政治及公共行政）嘅課程，以二等一級榮譽(Second Class Honours，Upper Divison)畢業。喺一四年入學嘅黃之鋒，在學嘅六年官司纏身，仲曾經被判即時入獄添！佢喺貼文中形容係歷盡波折先畢到業，唔止提到曾因判囚而停學，仲自爆試過喺荔枝角收押所內考試。

但佢又話對好多同學嚟講，大學畢業係人生轉捩點，佢就冇非常強烈嘅感覺，因為個人前路已受官司訴訟同政治風暴所限，所以都唔太可以有人生規劃。眼見唔少政界人士都會去海外深造，佢話因為遭限制離境，所以冇可能去海外，就算喺香港都因為唔知幾時要面對監禁而難以進修，話唔定一直都倒數緊擁有人身自由嘅時間，所以佢會選擇更加專注咁投入公共事務。