中環出更：區議員開會離題 阻官員離場爆混亂
屯門區議會尋日召開大會，當討論青山灣有羈留人士拒絕領取膳食事件嘅時候，民政事務專員話相關事件不屬於區議會層面，隨即離席並由會議室後門離場，及後更爆發混亂，部分區議員堵塞正門同埋後門，搞到其他官員無法離開。
坐門口 「你跨過我哋囉」
多名區議員喺會議上要求討論相關事件，但民政事務專員話事件同區議會事宜無關，又提醒區議會主席陳樹英要審慎處理，點知一眾區議員堅持討論。其後，民政事務專員話將會離場，區議員就高呼「民政處可恥、政府公僕，冷血無良」，又話青山灣屬於屯門範圍。繼而有幾名區議員坐喺會議室正門門口，聲稱「你可以走o架，跨過我哋囉！」民政事務專員聞言就即刻掉頭往後門方向，但區議員就再堵塞同屬會議室後門嘅議員休息室入口，令到政府官員無法離場。有官員要求保安員幫手清場同開路，不過有區議員強調官員無權進入議員休息室。
其後，有屯門民政處官員揚言報警，但當議員發言後，主席陳樹英宣布青山灣事件討論完畢並開展下一項議程，而民政事務專員同埋官員就重新列席會議喇。
根據區議會嘅文件，民政處曾指出經內部研究後，覺得該項議題涉及非屯門地區層面事宜，有違《區議會條例》第六十一條所講有關區議會嘅職能，所以政府人員同秘書處職員都唔參與有關議題嘅討論，而秘書處亦唔提供秘書服務。
卓妮