政情：死撐銅芯口罩幾靚 薛永恒被嘲眼光差
疫情襲港八個幾月，唔少香港人都將戴口罩當成習慣。之不過，喺街上絕少會見到有人佩戴由政府派發嘅「銅芯抗疫口罩」，事關呢款口罩被嘲外貌酷似「底衫褲」，就連主持緊網台節目嘅議員葛珮帆（EQ），都忍唔住向擔任嘉賓嘅創新及科技局局長薛永恒（Alfred）反映：「下次萬一真係要再派口罩，唔好整啲咁醜樣嘅好唔好啊！」
「戴足三個月 愛上咗佢」
之不過，負責「銅芯口罩」嘅Alfred就當然死撐：「老老實實，我覺得呢個幾靚！」搞到EQ聞言都不禁話：「咁你嘅審美眼光有啲問題！」Alfred就解釋，話審美眼光人人都唔同，更加豪言：「我戴咗呢個口罩足足兩個幾、三個月，我愛上咗佢，我覺得呢個口罩好正！」
咁「銅芯口罩」靚唔靚又真係見仁見智嘅，之但係政府早喺五月初，亦即係接近五個月前推出呢款口罩，當時主要官員都可以率先拎一個自用。唔知Alfred到底係口誤，抑或係唔小心自爆自己用咗差唔多兩個月時間，去到六月底、七月初先接受到戴呢個口罩呢？