中環出更：社企業務冷門 徐苑思：年輕人經營勝在有魄力
年輕人踏足社會，除咗成為朝九晚五嘅受薪族，亦不妨考慮投身社會企業。早前完成嘅「香港社會企業挑戰賽」，就係一項鼓勵年輕人創辦社企嘅活動。香港社會企業挑戰賽項目總監徐苑思話，初出茅廬嘅年輕人雖欠營商經驗，但勝在有魄力有熱誠，只要把握到社會嘅痛點或未能滿足嘅需求，再加上一個好嘅意念，就可能闖出一片天地。
雖然社企所着眼嘅業務，往往都屬於較冷門嘅範疇，但會唔會出現唔同嘅社企經營者，着眼於同一個社會使命而引起生意上嘅競爭呢？徐苑思唔排除呢個可能，但就未必會引起「搶生意」嘅問題，因為同一個社會痛點，並非只得一個解決方案。佢舉例話今次有賽事有兩支參賽隊伍，其設計不約而同都係有助解決視障人士嘅生活問題，譬如參賽團隊WeVoice+係研發手機應用程式。視障人士只需將該程式開啟並按拍照鍵，就可以將餐牌、報章或卡片上面嘅文字轉換成語音。而另一隊伍所設計嘅拐杖外掛智能裝置，其受眾雖以長者為主，但其內置嘅追蹤功能，可以得知視障人士身處嘅位置。
麥子澄：受爺爺啟發製智能拐杖
今次研發拐杖智能裝置嘅團隊Walkpner，係幾位來自公開大學、理工大學同香港大學嘅同學一齊努力嘅成果。其中公大同學麥子澄話，由於患有認知障礙症嘅爺爺試過出街蕩失路，而爺爺又對一切穿戴式嘅追蹤裝置非常抗拒，於是佢就萌生喺拐杖附加智能裝置嘅構想。麥子澄又指產品於去年曾有海外顧客打算大量訂購，惟當時資金有限單靠人手裝嵌根本難以應付，不過今次得獎所獲嘅獎金，就有助產品於明年年初推出市場。
另一得獎團隊Mealingful，着眼於長者嘅飲食。港大同學羅卓賢見患有吞嚥困難嘅長者難以享受美食，於是聯同幾位同學成立軟餐嘅銷售平台，以便居家安老嘅長者都可以品嘗心愛嘅味道。羅卓賢指不同產地嘅軟餐風味各異，如日本產品通常會出現咖喱或照燒汁，本地廠家着眼於叉燒或粟米魚柳等本地菜式，並推出應節食品如軟餐月餅，老友記咁就食得安心又健康啦。
卓妮