政情：衞生惡劣 市民叫掟高官去堆填

咁多市民留言並唔係讚，反而係鬧爆食環署喺街市嘅清潔衞生做得唔夠囉！話說貼文係話疫情下食環署加緊清潔工作，同埋持續進行防治蟲鼠工作，仲問市民希望政府喺邊方面做多啲工夫。而網民就「群情洶湧」，即刻鬧爆政府！有人關注街市嘅鼠患問題，話「老鼠周街走都唔去捉」、「搞好鼠患問題先啦」；另有市民仲「火滾」，話「扔晒班高官去堆填區先」、仲話「最受歡迎嘅施政報告內容就係三司十三局總辭！」

局長快問快答 留言投訴多

其實創新辦負責嘅施政報告Facebook都唔係第一次貼文，之前仲發過唔少有關社區問題嘅貼文，網民留言都比較踴躍。反觀多位局長嘅「快問快答」短片，就冇乜人理喇！最早上載影片嘅民政事務局至今得三十六個留言；財經事務及庫務局就有十三個；發展局嘅影片就有十四人回應；創新及科技局就得八個；而運輸及房屋局算係最多，有三十八個留言，但大多數都係投訴囉！

本報踢爆街市淪「老鼠樂園」

今次嘅貼文題為「你認為政府在環境衞生方面如何可以做得更好」，有七十幾個留言，當中唔少人留言係鬧爆嘅。其實本報就曾經踢爆多個食環署轄下嘅街市環境衞生惡劣，部分街市淪為「老鼠樂園」。但食環署都係「踢一踢先郁一郁」，全城關注嘅時候就多啲搵人巡查，其後都係「還原基本步」囉。

最近新冠肺炎疫情反覆，未知幾時先至結束，加上香港就快踏入冬季，隨時爆發冬季流感，再加上本港最近又有市民感染大鼠戊型肝炎個案，三面夾擊，真係唔知點算？

話時話，食環署一直被外界炮轟滅鼠不力，其轄下嘅街市衞生好有問題，有市民直情留言話「十個街市、十個都唔合格」。做得咁差，唔單止食環署署長劉利群已經畀市民鬧爆，佢嘅頂頭上司食物及衞生局局長陳肇始當然甩唔到身，要齊齊孭鑊呀！