中環出更:毛孩如家人 陳恩德當係大仔

好多人都視「毛孩」為家庭嘅一分子。仁愛堂前總理陳恩德都話留意到現今社會嘅家庭結構漸起變化,有部分婚後唔想生BB嘅夫婦,鍾愛寵物如同己出。而佢就話屋企隻貴婦狗Choco今年三歲,相當於人嘅二十歲,所以佢同得十八歲嘅長子講,Choco先係「大佬」!

既然關係咁親密,寵物嘅健康狀況當然不容忽視啦,因此近年嚟陳恩德都埋首經營寵物保健品,仲同連鎖藥房合作開設寵物藥妝添!對於有啲主人用蟲草、靈芝為寵物補身,陳恩德話舊時大多用剩菜殘羹嚟餵飼貓狗,但呢啲食物所含嘅澱粉、調味料同添加劑,對寵物嘅健康恐構成負面影響,所以寵物應該要有其專用嘅保健品。

李慧芬:貓食濕糧多易蛀牙

無論人或寵物,「病從口入」嘅道理都係一樣。香港中華廠商聯合會常務會董李慧芬(Stella),都好關注家中四隻愛貓嘅健康狀況。佢留意到「罐罐」雖然係貓貓嘅至愛,然而濕糧食得多好易會蛀牙,Stella話見到貓貓受牙患折磨,自己亦好唔安樂。儘管市面上可以買到貓貓嘅口腔護理工具,但佢自問未能掌握同貓貓刷牙嘅技巧,惟有喺乾濕糧嘅比例上花啲心思。

就算千呵百護,寵物終有離開嘅一日。傑出青年協會前主席姜炳耀(Ben)同太太,陪伴佢哋十多年嘅一對史賓格犬早前先後離世,難過就如痛失親人一樣。Ben話兩隻狗女雖非同一血脈,但年紀稍大嘅姐姐樂於保護淘氣嘅妹妹,又勇於對抗街上其他狗隻嘅挑釁,姐妹情深令人動容。後來姐姐因病不治,妹妹連續三個月仰空哀鳴。四個月前妹妹亦患癌去世,Ben同家人都相當不捨。佢話太太雖有意再養另一犬隻,但前提係絕不幫襯寵物店,以免助長不人道嘅寵物繁殖。

卓妮

第一手消息請下載on.cc東網iPhone/iPad/Android/Windows Phone Apps