中環出更：張順光：獲珍藏係緣分遊戲
日前城中發生一宗爆竊案件，失物牽涉金額之高，轟動本地收藏界。專門收集郵票、明信片、舊照片同歷史文獻嘅香港收藏家協會前會長張順光（Alan），就認為一件物品之所以成為收藏家嘅珍藏，其實都好講緣分，因為收藏家就算腰纏萬貫，亦要視乎有冇遇到心頭好嘅機會，仲有賣家又肯唔肯割愛，真係天時地利人和都要夾到，難怪收藏家之間經常都會話收藏係「緣分嘅遊戲」。
對於有收藏家痛失心頭好，Alan就話件收藏品若果係價值連城，又或者自己係非常珍愛嘅話，佢會選擇將收藏品放入銀行保險箱。如果有機構要求借出藏品搞展覽嘅話，佢都會向主辦方提出為藏品買保險呢項必要條件。Alan憶述前年有一個電車回顧展，佢就借出好多舊相、電車票等珍藏畀主辦方，當時嘅投保額都要六位數字，以保障一旦藏品遺失或毀壞嘅損失。
馮炳壽收藏品 保安級數如銀行
喜歡收藏錢幣嘅大中華香港收藏家協會創會會長馮炳壽，就話要為收藏品買保險並唔容易，尤其是欠缺拍賣價嘅收藏品，保險公司嘅估值工作會好棘手，而縱使接受投保，收藏品嘅存放亦要符合保險公司嘅嚴格要求，所以佢覺得倒不如做好收藏品嘅保安會更加實際。而佢自己對於收藏品嘅存放、保安級數就同銀行一樣咁高。馮炳壽指好多收藏家，以為心頭好並非示於公眾，防盜嘅意識往往較弱，而佢自己就因經營收藏品買賣嘅關係，會特別注重失竊嘅風險。
香港浙江省同鄉聯合會常務理事沈墨寧，三十年來所收藏嘅木雕不但數以萬計，且動輒都過百年歷史，儘管具有文化價值，但沈墨寧覺得存放地點嘅門禁毋須過分森嚴，理由係木雕藏品並非金銀珠寶，唔擔心會引人犯罪咁話。
卓妮