政情：泛民延任民調展開 網民潑冷水

民主黨同公民黨分別喺社交平台專頁貼文宣布去留民調尋日開始，呼籲市民記得聽電話同作出回應。兩個黨都話傾向留任，仲話無論走定留，希望主張留喺議會同主張杯葛議會嘅陣營要繼續合作添！

被嘲黑箱作業 為錢留低

不過，部分網民就好似唔係咁諗喎，有人留言話泛民議員係為咗錢想留低、質疑民調係「黑箱作業」；另外都有網民叫佢哋留低嘅。無論點都好，兩個黨都話會服膺民調結果，咁就真係要拭目以待喇！

之前表示傾向於辭任嘅議員朱凱廸，就好似唔想理今次民調喎，仲諗好辭任後做乜嘢添。佢喺社交平台話，九月三十日卸任後，希望可以做多啲氣候災難嘅公眾教育，似乎就關注緊氣候變化問題喇。而早前話會延任嘅非建制派議員鄭松泰就重申對「總辭」持開放態度，若民調結果支持總辭作「政治表態」，並確定泛民主派嘅直選議員拒絕延任，屆時佢自有決定喎。