中環出更：官腔宣傳片 市民嘲陳帆髮型特別
施政報告喺十月十四日發表，政府喺社交平台開設專頁展開諮詢，收集網民嘅問題，再推出一系列同局長快問快答嘅短片。尋日就出咗運輸及房屋局局長陳帆嘅訪問片段，但陳帆對網民嘅問題答唔出重點，條片出咗街，反應好冷淡。
「快問快答」等於冇答
對於有網民話佢嘅髮型好特別，陳帆自嘲髮型都真係幾特別，因為戴咗口罩之後大家都仲認得佢喎。有網民覺得公屋輪候時間愈來愈長，驚單身人士上樓都要等成五十年，陳就話經過政府多年覓地建屋，預期日後公屋供應會拾級而上，但係都係冇答到點樣增加供應。
亦有網民指搭車好貴，想知政府有咩方法解救。陳只係話政府明白市民喺公共交通費用嘅負擔，指已經提供咗補貼，即係叫市民自己諗辦法。
另外，有網民批評運輸署淨係識話喺市區踩單車好危險，政策短視落後，陳竟然話市區係人多車多嘅地方，踩單車嘅話，去單車徑會理想啲。咁講法，如果冇單車徑咪即係唔踩得單車？
快問快答，但陳帆答咗等於冇答，仲講乜嘢同市民溝通呀！唔怪得條片出咗街，冇乜市民睇，與其嘥公帑做無謂宣傳，不如派錢益市民好過啦！
卓妮