政情:落街玩雙槓跣手 范國威險爆頭

政府早前宣布逐漸放寬防疫措施,而康樂及文化事務署嘅部分康樂場所亦分階段重新開放。唔知係咪太耐冇做運動,前立法會議員、現任西貢區議員范國威(Gary)乘機落街玩雙槓,不過喺鍛煉途中唔知係「跣手」定「手軟」,差啲喺雙槓上面跌落地。雖然佢及時用胳肋底夾住碌槓,但個頭都係撞咗落去。真係望落都覺痛呀!

Gary尋日喺社交平台上載影片,條片前半部分見到冇着上身衫嘅佢,好純熟咁喺雙槓上面鍛煉,仲起勢咁「吊吊揈」、愈揈愈高添。不過人生總係大起大落,有時飛得愈高就跌得愈痛,喺片段後半部分就見到Gary突然手軟,從槓上面跌咗落嚟,仲撼到個頭添。

奉勸市民跟教練指導

唔少網民都留言叫Gary小心啲,亦都有人話佢肌力未夠,唔應該做呢啲危險動作,同埋勸佢要注意吓,出手汗就會容易跣手。而Gary都話冇諗過街頭玩健身都有「爆缸」風險,奉勸市民鍛煉嘅時候要跟從專業教練嘅指導。佢都經一事長一智,未來會再鍛煉吓基本功咁話喎!

第一手消息請下載on.cc東網iPhone/iPad/Android/Windows Phone Apps