政情：黃之鋒死撐唔會放棄國際戰線
《港區國安法》已生效咗兩個幾月，官司纏身嘅前香港眾志秘書長黃之鋒近日接受電台訪問時承認，依家每朝都會擔心被警員上門拘捕，但同時又認為港區國安法對勾結外國勢力嘅定義含糊，死撐唔覺得「國際戰線」係死路一條，仲表明唔會放棄，未來行事會小心謹慎。
黃形容依家喺度同時間競賽，會爭取機會接受外國傳媒訪問、出席國際研討會同投稿至海外等，務求令國際社會了解香港現況。佢又話以前國際社會仲未關注香港，所以香港政治人物要用好多精力同時間游說先達到目的，不過因為依家國際地緣政治出現變化，國際社會對香港或者中國嘅制裁行動已經唔再取決本港政客嘅訴求，甚至快到追唔切。
公民黨避參與外國研討會
另外，有成員被指「尋求外國勢力干預特區事務」嘅公民黨，早前派出六人參加原定今年舉行嘅立法會換屆選舉，但最終有四人被取消參選資格。該黨主席梁家傑就話已有心理準備下一屆會絕迹立法會，又話為免誤墮法網，依家由外國團體主辦嘅研討會都已經推得就推。