政情：拖埋法治墊底 鄭若驊死不退位
香港嘅核心社會指標評分再創新低！香港民意研究所尋日公布一系列最新調查報告，一千零七名本地受訪者對本地社會指標進行評分，結果顯示，五項核心社會指標全部下跌，且低於五分，其中「法治」排名最低，只得三點四分，創一九九七年六月有紀錄以嚟新低。有學者話民望長期「墊司底」兼被嘲為「避政司司長」嘅律政司司長鄭若驊對法治得分「包尾」責無旁貸，鬧佢唔單止其身不正兼管理下屬不善，仲叫佢辭職問責落台添。
調查喺上個月三十一日至本月四日進行，實效回應比率為五十八點四個百分點，喺核心指標方面，以零至十分評價，市民對「自由」同「繁榮」嘅評分較高，同為四點一分，但「安定」、「民主」同「法治」都低於四分，分別得三點六、三點五同三點四分。五項指標都較上月中嘅調查錄得明顯跌幅，評分亦都係連續三次下跌，當中「自由」嘅跌幅較大，較上次下跌零點六分，「法治」更加係排包尾，較上次下跌零點四分。
學者斥其身不正 管唔好下屬
香港理工大學專業及持續教育學院講師陳偉強話，法治低分嘅原因同律政司檢控工作有關，佢話警方舊年喺理大拘捕大批佔領校園嘅示威者，但檢控嘅人數相對較少，唔明白點解律政司唔用暴動罪或非法集結罪名檢控破壞校園設施嘅人士。陳偉強又話，鄭若驊作為律政司司長絕對係責無旁貸，個人唔單止其身不正，亦都唔識得好好管理下屬，導致律政司出現離職潮，當中有前檢控官出版書籍教授年輕人逃避法律責任，認為鄭理應辭職問責下台，早就應該退位讓賢，畀合適嘅人選接任。
多項判決惹爭議 難辭其咎
而理大專業及持續教育學院社會科學人文及設計學部高級講師伍銳明，就認為法治得分最低，同《港區國安法》嘅執行、近期法庭多項具爭議嘅判決，以及內地拘禁早前潛逃台灣失敗嘅十二位港人有關，鄭若驊亦係難辭其咎，係其中一位要為法治排名「包尾」負上責任嘅政府官員。