中環出更：楊孫西第一份糧買東德菲林相機
從前社會物資匱乏，攝影作為一種嗜好，並非人人可以負擔。香港中華總商會榮譽常務會董楊孫西日前舉行藝術展，除咗展出近四十幅書法外，仲有近百幅攝影作品。對攝影有濃厚興趣嘅楊孫西，自爆當年踏入社會謀生，所獲得嘅第一份薪水全數用嚟購買一部心儀已久嘅菲林相機，佢清楚記得售價係五百蚊，部相機仲要喺前東德製造，今日已經冇可能再生產，彌足珍貴啊。
楊孫西嘅鏡頭底下，無論風景人物抑或生活小節，都可以成為拍攝對象。對於今日踏入數碼時代，幾乎人人都有智能手機，經歷過菲林時代嘅楊孫西，就認為拜數碼技術所賜，用智能手機攝影真係輕而易舉，省卻咗好多拍攝前嘅調校。雖然撳個掣就影得，但反而更加講求取景同個人風格。楊又話疫情期間多咗時間留喺屋企，於是佢就透過電腦整理番以前影落嘅相片，將影像數碼化然後儲存入電腦裏面。
中華廠商聯合會副會長史立德，都話自己後生嗰陣社會冇咁富裕，唔係每家每戶都有能力添置一部電視機，於是聽收音機就成為最大眾化嘅娛樂，而史立德嘅第一份糧，就用咗五十蚊嚟買咗部手提式原子粒收音機，非常實用之餘，走出街一路行一路聽，都感覺到途人投以羨慕目光。不過呢部原子粒收音機早已不知所終喇，否則的話應該具有收藏價值。
盧文端首份工喺爸爸工廠幫手
中國僑聯副主席盧文端第一份工喺爸爸工廠幫手，第一份糧就用咗嚟買金錶，靚之餘仲可以保值嘛！盧話佢啲朋友知道佢鍾意錶，都會送好多靚錶畀佢，但有趣嘅係盧文端平時甚少戴錶出街。不過盧嘅囡囡盧金治就話爸爸好守時，仲話爸爸除咗錶之外仲好鍾意收藏靚酒，不過美酒當前都係淺嘗即止。由於盧文端並非無酒不歡嘅劉伶，所以有時都會將珍藏嘅佳釀送畀朋友飲，等大家一齊高興咁話。
卓妮