中環出更：何啟明英文生疏 難搵人惡補
學生英文成績唔好，都可以搵人補習，但如果問責官員嘅語言水平未夠班又點算好呢？勞工及福利局副局長何啟明今年六月履新，返工第一日見傳媒答英文問題嘅時候要睇「貓紙」先應付到，當時佢嘅頂頭上司、勞福局局長羅致光叫大家畀多啲時間佢適應。喺中文大學畢業嘅何啟明，早前都承認英文係有生疏，但係就好難搵到一個熟悉佢工作範疇嘅人嚟幫佢惡補。睇嚟何啟明上任三個月，英語水平仍然有進步空間喎。
指做官唔易平衡各界取向
何啟明話明白大家對每個官員都有期望，而以往喺立法會同區議會嘅工作，接觸嘅文件以中文為居多，就算係落區亦都甚少用英文。不過依家做咗副局長，工作模式點都會有轉變，佢話每日收到嘅電郵都係英文為主，又話嚟緊立法會復會，有機會要出席會議，接受議員質詢。眾所周知，議會裏面有個別議員好鍾意用英文提問，何啟明話會盡其所能回答問題。
咁做官員同議員又有咩分別呢？何啟明話依家多咗參與政策討論，企喺政府角度，要兼顧多方面意見，平衡各界取向係有難度。何又指自己對勞工範疇較為熟悉，不過社福方面就比較薄弱，所以會多啲向羅致光取經，又話仲係適應緊喺新崗位服務市民。
卓妮