政情：招國偉首次落區 大讚公屋冇得頂

點解咁講？招國偉喺貼文仲自爆早排被批評成日講居屋講買樓，唔去關心基層住屋嘅問題，咁佢話惟有轉個身，尋日朝早第一次落區，第一次巡邨，第一次視察新屋邨入伙，第一次到火炭駿洋邨了解環境呀！

賣花讚花香 盼居民安居樂業

佢所屬嘅組織係關注公屋嘅，今次竟然係首次巡公共屋邨，有乜感受？佢大讚房委會嘅公屋冇得頂，仲話希望居民能夠安居樂業。咦！佢係房委會委員，竟然喺度賣花讚花香，簡直係硬銷喇！

話時話，早前話有新一批居屋發售，預計會有折添，市民梗係好緊張喇，招國偉咪係咁講居屋價格囉。之但係，佢早幾日都有出席一個記招，要求政府喺九月底前歸還被徵用做檢疫中心嘅駿洋邨一至三座，同埋提供措施援助畀嗰啲單位嘅準租戶。