中環出更：做KOL未必要省鏡 文雅彥：最緊要識包裝
最近有唔少人都自稱係「KOL」（網絡紅人），甚至有人開班教授相關技巧，到底做KOL有咩條件呢？經營網紅孵化平台嘅文雅彥就話，其實素人都可以做KOL，唔一定要靚仔、靚女，只要對自己宣傳嘅產品有認識，令觀眾對你有信心，加埋識得包裝，就可以做到一個成功嘅網紅！
文舉例話，喺內地有一個身材比較肥嘅人，佢好鍾意食即食麵，又對唔同牌子、唔同味道嘅即食麵好有研究，最終成為KOL界嘅「即食麵專家」，強調識得包裝自己，先可以做到一個成功嘅網紅。佢又話，隨住網絡發展，加上依家網上購物平台愈來愈多，亦帶動網紅增長。
李劍功：港網購發展限制多
本身喺大型電器連鎖店工作嘅李劍功就提到，內地網購行業喺過去十年增長迅速，香港亦正逐步開始發展，尤其是處於疫情之下，本地網購服務亦錄得爆炸性嘅增長。之但係，佢就覺得香港喺發展網購方面有唔少限制，例如本港嘅物流成本太高，物流服務發展亦唔及內地發達，加上香港本身太方便，而且香港人重視個人私隱，所以本地嘅網購平台唔容易得到市民登記。
不過，李就相信，只要市民一旦體驗過網購嘅方便，就會樂於繼續採用，況且年輕人慢慢會成為消費主力，所以對網購業務前景好有信心；至於網店就唔會取代實體店，反而兩者可以互補不足添！
而香港城市大學市場營銷學系講師鍾奇峰就分享作為「直播主持」嘅經驗，佢話自己依家一個星期會開九場直播，平均每日兩至三個鐘。佢提醒各位有意加入KOL行列嘅人，一定要準備好每次開播嘅話題，否則啲觀眾睇完一次之後，就唔會再返轉頭咁話喎。
卓妮