中環出更:房屋運輸乜都慢 網民重點狙擊陳帆

政府就施政報告公眾諮詢採取新模式,喺網上收集意見後,各局長會拍片解答市民問題。運輸及房屋局局長陳帆就喺最短時間內吸引最多留言,市民明顯唔妥佢歎慢板喇!

有關方面話歡迎市民即管問即管講,網民都一於唔客氣咁連環發炮,睇嚟對陳帆好有意見。運房局提出嘅《鐵路發展策略2014》計劃起七個鐵路項目,但至今只係得兩個項目交咗上立法會,網民留言建議鐵路項目最多起三年就好通車。而其他意見都圍繞住唔同範圍,包括要求加密所有專利巴士班次至十五分鐘內。

房屋問題當然都唔少得喇,網民大吐苦水,話輪候公屋問題嚴重,希望陳帆可以加快填海進度,增加房屋供應。

許正宇徐英偉被促拍片找數

其實財經事務及庫務局局長許正宇及民政事務局局長徐英偉都有接受市民提問,但都唔及陳帆咁惹火。有市民希望許正宇可以對股票買賣嘅應用程式加強規管,仲有市民搞笑咁叫局長畀個股票冧巴揸手添!

而做「白老鼠」嘅徐英偉率先上陣,早前就引起市民誤會佢會即刻解答問題,有人就追數問許正宇同徐英偉兩個局長快啲拍片回應意見。

卓妮

第一手消息請下載on.cc東網iPhone/iPad/Android/Windows Phone Apps