中環出更：黃傑龍：港康碼與內地大不同
近日有唔少政黨都建議政府推行「港版健康碼」（港康碼），然而好多人都以為，一旦持有證明自己通過檢測嘅港康碼，就可以去商場行街同幫襯餐廳堂食。從事飲食業嘅稻苗學會會長黃傑龍（Simon）認為，呢個講法存在誤解，指內地推行嘅其實係「防疫健康信息碼」，同港康碼並非同一回事。
Simon話唔少市民都質疑港康碼嘅可行性，普遍嘅疑問係今日檢驗咗係陰性，唔代表隔幾日後仲係陰性，若果就咁憑港康碼就可以入商場同食肆，究竟可以維持幾耐呢？Simon就引述醫學會傳染病顧問委員會主席梁子超嘅意見，指港康碼肯定唔安全同天方夜譚。Simon跟住就指出，內地所採用嘅其實係「防疫健康信息碼」，其運作係基於一個每十五分鐘就會更新一次資訊嘅動態超級大數據平台，主要係通過手機定位訊息檢查係咪確診者或疑似確診者、係咪緊密接觸人士、近十四日有冇到訪過外地、入境人員等訊息，向用家發出一個即時風險評估。
手機定位追蹤 港難推行
之不過，Simon都相信「防疫健康信息碼」好難喺香港推行，除非所有人都唔介意將自己手機嘅GPS定位、有關行蹤嘅訊息交畀超級大數據平台去評估風險。Simon話至少佢自己一定唔肯囉！
卓妮