政情:交唔足租 田北辰服裝店被封沒收貨物

受社會事件同新冠肺炎連環打擊,唔少零售業人士都大嘆生意難做。本身有經營本地連鎖時裝品牌嘅議員田北辰,旗下一間位於尖沙咀大型商場嘅分店,近日因交唔足租金而被執達吏封舖。田就話,該商場業主唔願意同租客共度時艱,一直唔願意減租,依家更被封舖同沒收貨物,做法好冇人情味喎!

怨業主唔減租冇人情味

田北辰話,去年爆發反修例風波後,該商場人流已變得冷清,分店下半年生意額更大跌一半,但業主一直唔肯減租,所以佢舊年自行繳交八成租金,期間業主已經不斷向佢追討其餘兩成金額;但近半年受疫情影響,該分店生意額按年大跌七成半,收入無法應付全額租金,所以自二月開始只係繳交五成租金。

佢又提到,該品牌其他分店嘅業主都願意減租抗疫,有業主減租八成,最少嘅都減咗約四成租金,指自己亦嘗試同該分店業主商討減租但唔成功。佢批評,該業主未有因應現時惡劣市況調整租金水平,做法並冇絲毫體恤,更不斷催促佢補回租金差額,如今更派執達吏封舖同沒收貨物,做法好冇人情味。

第一手消息請下載on.cc東網iPhone/iPad/Android/Windows Phone Apps