中環出更：想城市有活力 葉頌文：街坊要參與
香港地少人多，要做好城市規劃，改善生活質素，的確唔容易。環保建築師葉頌文（Tony）日前喺一個座談會分享對城市規劃嘅睇法，佢覺得城市要有活力，要做到因地制宜，就要同城市以外嘅人交流，呢代人同下一代人點樣溝通，人嘅軸線都好重要，佢認為人類並唔係城市嘅設計者，而係一個創作者，點去幫助到每個持份者一齊去設計城市係關鍵所在。
有乜嘢建議畀年輕人規劃城市？Tony話以前曾舉辦一個活動，透過拍攝一幅最能夠代表社區同最鍾意嘅建築物照片，佢發現有同學揀咗街角一間士多做作品。點解會影呢張相？同學話間士多勾起細個嘅回憶，就係每逢放學嘅時候，嫲嫲都會喺士多買維他奶畀佢，由此可見，唔少人對社區嘅事物都有一定嘅情意結，佢話其實每一個人都有責任有能力話番畀個城市知，居住嘅社區有乜嘢地方值得保留，要靠街坊自發性參與。
張浩榮：規劃以人為本
同場仲有香港規劃師學會社區規劃委員會聯席召集人張浩榮（Louis）、香港聯合國教科文組織協會協理副會長楊慕貞（Shirley）同香港大學公民社會與治理研究中心高級項目經理周韻芝。Louis認為城市規劃最緊要係以人為本，因為無論硬件整得幾好，都要為人居住而設，建議增加多啲公共同休憩空間，令城市更加宜居。Shirley就同意Louis嘅講法，話要預留空間畀唔同年齡層嘅人士生活，例如喺公園劃出部分範圍畀長者休息，捉棋娛樂。
座談會由香港女青年商會舉辦，係SDG（可持續發展目標）小專員計劃2020——創•己之城嘅一部分，擔任主禮嘉賓嘅規劃處前處長凌嘉勤話最複雜嘅系統就係建造城市設施，尤其係房屋問題，由於土地長期不足，解決呢個問題係無「特效藥」，要靠好多代人努力建設先可以構建理想嘅城市生活。
卓妮