政府話會用盡方法覓地起樓，但公營房屋嚴重短缺嘅情況冇改善，甚至加劇惡化。房委會話截至今年六月底，輪候公屋嘅時間已升至五年半先有望上樓，有團體更估計好快會升到六年。老實講，政府三年上樓嘅承諾早就冇咗，而輪候時間只會上升，唔會下降，好似上樓無期咁，尤其房屋問題係香港深層次嘅矛盾，基層市民嘅怨氣好大，運輸及房屋局局長陳帆再唔諗辦法加大公屋供應量，遲早搞到民怨大爆發，真係唔知點收科？
