中環出更：浸大不續約 邵家臻執定包袱
因違法佔領行動案而被判囚八個月嘅社福界議員邵家臻，喺上月底正式收到浸大通知，指新學年不獲續約，現有合約將於本月底結束。換言之邵家臻要執包袱走人，近日佢仲頻頻發文講吓執包袱嘅情況。
邵家臻喺Facebook形容辦公室裏面嘅書同雜物好似山咁，話自己一個人搞唔掂，好彩有學生幫吓手。佢仲話，近日都有好多位舊生自動請纓話幫手執嘢。一向以為結婚同埋葬禮先至會聚首，但原來執包袱都係一個機會，可以同學生敍舊見面，覺得都係一種價值嚟。
至於進度如何，邵家臻就話依家執咗三日，暫時都係揀選一下邊啲嘢比較重要同值得留，初步都執咗七袋紅白藍膠袋嘅書，當中佢自己嘅研究報告、作品就佔咗一袋。佢話有部分物品打算留畀浸大學生，邀請佢哋去辦公室任拎，如果冇人要先至再捐出去。
諗定清埋立會辦公室
唔止浸大教席，邵家臻喺今屆任期完結後五年內不得參選立法會，所以佢都要諗辦法處置立法會辦公室嘅私人物品，雖然仲未郁手，但佢話一諗到要執兩邊就真係好頭痛。又話初時以為可以好瀟灑咁離開浸大，點知原來好多書要拎，仲要屋企同立法會都未必放到咁多嘢，搞到一向冇打算租迷你倉嘅佢，都要重新再考慮喇。由於依家盛傳議員任期或會延長，邵家臻話一旦冇得延，兩個月內要執清兩個辦公室就真係好慘喇。
卓妮