隨住染疫人數不斷擴大，唔少住宅大廈都遭到衞生署列入疫廈名單。九龍城翔龍灣屋苑其中兩座大廈，喺早前先後有住客確診，從而成為疫廈。但點知事隔幾日，衞生署先至澄清係誤報，染疫人士根本就唔係嗰兩座大廈嘅住客！雖則話屋苑嘅住客一場虛驚，不過該兩座大廈已經有居民因此而改為居家工作，甚至被迫放無薪假，物管公司亦已額外花費數萬元安排全幢大廈大清洗。衞生署署長陳漢儀今次又擺烏龍，仲要咁遲先發現，真係累人累物累街坊！
