中環出更：妻會否辭美媒工作 周浩鼎支吾以對
美國財政部前晚突然宣布制裁十一名中港官員，指佢哋打壓香港嘅自由同民主進程。事件引發唔少建制派不滿，當中議員周浩鼎（Holden）尋日下晝仲親身到美國駐港總領事館抗議。之不過，眾所周知Holden太太正係服務於美國某大新聞媒體，Holden被問到太太會唔會辭去相關工作時，佢就支吾以對。
僅指太太負責廣告銷售
美國宣布制裁多名香港官員後，佢哋喺美國持有嘅資產將會被封鎖，同時亦禁止同美國人或者喺美國境內進行交易等。外界普遍相信，美方日後或會制裁更多在港親中人士，有可能包括一眾建制派議員。Holden尋日出席請願行動期間，斬釘截鐵咁話自己唔擔心被制裁，強調自己喺美國無資產，但當被問到有關Holden喺美國某大新聞媒體打工嘅太太，佢就冇正面回應，只係話太太負責廣告銷售工作，又重重複複咁話佢太太嘅事，就係太太本人嘅事。
查實早前外交部禁止美籍記者在港採訪時，Holden已經被追問有關佢太太嘅情況，相信若中美雙方未來有進一步舉措時，Holden都要再次回應類似嘅問題喇！
卓妮