政情:曾接受確診攝影師採訪 麥美娟:全程有戴罩

新冠肺炎確診患者遍布各行各業,就連政界同新聞界亦未能幸免,最近就有一名電視台攝影師證實受感染,有消息話佢喺本周日曾經採訪工聯會議員麥美娟(Alice)。Alice尋日就喺社交網站貼文,話自己當日的確有接受訪問,但就冇接觸過嗰名攝影師,仲話自己全程都有戴住口罩,又希望確診者能夠早日康復!

稱與對方無任何接觸

繼日前有建制派政黨嘅社區主任不幸染疫,前晚再傳出有政界中人曾經接觸過確診人士,事件備受政圈及社會熱烈關注。

被指曾經接受過確診攝影師採訪嘅Alice,喺貼文中話自己同嗰名攝影師並無接觸過,又提醒市民,話依家疫情嚴峻,無論係為自己定為他人着想,都要做好防疫措施,呼籲大家要記住戴口罩、勤洗手,有唔舒服就要及早睇醫生。

佢都有做足保護措施,唔單止一直都有戴口罩,就連開會時都唔會除低,時常用酒精搓手液,入屋、上車前又會用消毒噴霧噴全身,因為自己係公眾人物、成日要接觸好多人,所以要做好呢啲嘢。問到會唔會做病毒檢測以求心安?佢話由第三波疫情開始至今,自己已經做咗兩次,因為今次有好多源頭不明、無病徵嘅確診者,唔想自己成為散布病毒嘅一分子,所以每隔一段時間都會check吓,等身邊人都安心咁話。

第一手消息請下載on.cc東網iPhone/iPad/Android/Windows Phone Apps