中環出更：青年攝影家：要趁後生追夢
好多電影小說都以追夢為題材，但下定決心追夢好需要勇氣，咁幾時追夢先最好？二○一五年國家地理攝影大賽青年組冠軍Kelvin就話追夢要趁後生，唔通淨係後生仔先追得夢？
Kelvin喺二○一五年因為去咗自己屋企後山飛鵝山影相，其傑作令佢得到攝影比賽冠軍。今年就喺第二屆數碼廣告（出版類別）比賽當中，與出版社及製作團隊一齊拎咗個銀獎。Kelvin希望透過自己攝影個故事，令大家更了解到香港年輕人點樣追夢，又可以多啲去郊外攝影，關心下郊野公園嘅生態。雖然話要趁着年輕去追夢，但唔係話中、老年就唔追得夢，因為目前呢一刻，已經係每一個人人生中最後生嘅時候，換句話講，就係想大家立即行動啊！
Rony拍霓虹燈 講街道文化
另一個參賽者，金獎得主Rony Kong就為香港慢慢消失嘅霓虹燈拍微電影。Rony話佢本身嘅工作以商業項目為主，而今次就講香港嘅街道文化。Rony覺得霓虹燈文化非常值得推廣，因為即將面臨消失，甚至一啲佢本身計劃咗嘅拍攝地點，要去到現場時先發現霓虹燈已經拆咗。
佢對拍微電影嘅心得係一啲太過資訊性嘅內容未必吸引到觀眾嘅眼球，所以佢先以講故事嘅方式去解釋香港嘅街道文化。
「創意香港」總監曾昭學指疫情凸顯咗一種新常態，就係大家嘅生活模式將會更趨網絡化同數碼化，有參賽組合本已付梓嘅著作，因今次比賽嘅網上宣傳而加印第二版，令人鼓舞。而其他參賽組別嘅網上宣傳，都精準咁利用書籍入面最吸引讀者嘅元素，於網上平台製作出同讀者緊密互動嘅方法。
卓妮