中環出更：4年提136急切質詢 僅12條獲批
議員經常就唔同議題向立法會提出急切質詢，但需要得到立法會主席嘅批准先可以「打尖」同埋喺會議上提出。根據立法會秘書處提供嘅資料，本屆立法會會期內，議員共提出一百三十六條急切質詢，但主席梁君彥就淨係批出十二條、佔整體一成都唔夠喎。究竟係議員說服唔到梁君彥，定係梁把關太嚴謹呢？
其實十二次獲批嘅急切質詢大多數都係關於公共衞生事項，其中有五條係關於新冠肺炎疫情；三條關於麻疹疫症。其餘獲批嘅有三條關於反修例示威，同埋一條關於港鐵多條線路系統故障。但其實本年度多位議員喺二月份提出三十條關乎疫情嘅急切質詢，雖然梁君彥冇批，但係就開設咗三小時嘅特別會議，等議員向官員盡情提問喇。
25議員共被逐97次
不過呢四年期間，有唔少議員就選擇其他難以接受嘅方式，包括大聲叫囂、衝擊主席台，甚至「掟臭彈」去表達意見，而被梁君彥逐出會議廳。根據資料，四年間有二十五位議員共被驅逐九十七次，其中人民力量嘅議員陳志全足足被逐十次，佢嘅盟友朱凱廸都緊隨其後，被逐九次。
卓妮