政情：大量年輕人入獄 象哥促糾正囚犯謬誤
喺舊年六月爆發嘅反修例風波至今仍未平息，唔少參與暴力衝突嘅年輕人被捕。喺尋日嘅立法會大會上，議員黃定光（象哥）關注將會有大量年輕人入獄，質詢保安局點樣從教育着手，協助改變囚犯嘅錯誤觀念。當局回應話依家社會瀰漫不守法嘅意識，令好多年輕人違法，懲教署要花好大努力，糾正佢哋嘅意識。
當局指所收書籍違規會被禁
象哥問呢個問題，其實係因為有泛民議員提出質詢，質疑囚犯收受外間書刊被扣，當局回應時就話懲教署並冇禁書名單，又重申每名囚犯透過親友探訪每月可取得六本書籍、期刊及教科書等，但如果書籍內容牽涉製造彈藥、武器或爆炸品及任何危險藥物的資料、描述使用暴力或逃離監獄、鼓勵賭博及不遵守監獄規則等內容，均會被禁。
當局又話每間懲教院所都設有刊物審裁委員會，對懷疑超越規範的書刊進行審視，公平公正審裁每本書籍。
另有民主派議員質疑懲教署在審批書籍時有政治審查，扣起一系列關於佔領運動同政治的書籍。教育界議員葉建源就希望政府多加協助在囚人士進修參加公開考試等。當局回應話局方鼓勵在囚人士學習更生，可按每個人個別需要提出申請。