政情：醫療券6年冇加碼 陳肇始不知民間疾苦
長者醫療券計劃自二○○九年起推出超過十年，計劃多次被市民批評，包括醫療券嘅金額少同使用範圍窄，以及長者被濫收診金等。尋日立法會大會有議員指出，近年嚟私家醫生嘅收費已經加咗好多，普通科診金現時嘅中位數都要三百元。但由二○一四年至今，醫療券嘅金額都冇增加過，批評政府不知民間疾苦。食物及衞生局局長陳肇始回應時指，香港人口老化日益嚴重，增加醫療券金額係要經過通盤考慮o架！
議員陳凱欣質疑，政府點解唔容許長者將醫療券轉交畀配偶使用，指可能老婆病咗，老公想畀佢醫病呢？陳肇始解釋，因為每名長者嘅健康需要都唔同，而政府當年設立醫療券嘅原意，係希望鼓勵長者能夠自我管理個人嘅健康狀況。避免有個人需要嘅長者將福利讓畀配偶，以確保醫療券可以有效咁用於持有人身上，政府對於醫療券轉移畀配偶使用嘅建議，暫時不予考慮。
被促擴受惠年齡 又耍官腔
陳凱欣又指過去兩年每逢六月，政府都向每名合資格嘅長者，額外一次性發放總值一千元嘅醫療券，呢項惠及長者嘅措施，點解今年會冇咗呢？至於議員田北辰就話唔少長者同佢講，希望政府可以將醫療券計劃擴展至六十至六十四歲人士，田都認為如果長者提早享有醫療券服務，能讓長者早啲學識照顧個人健康同埋預防疾病，對醫療制度而言其實係一件好事。陳肇始就繼續陳腔濫調咁話政府要審視唔同情況，例如因應來年經濟展望同埋政府嘅經濟情況而定，先至決定是否額外發放一千元嘅醫療券。
承認難提升長者防疾意識
陳肇始又話其實醫療券舊年都進行過檢討嘅，指醫療券好受歡迎，而現時醫療券亦可以喺地區康健中心使用，政府將會繼續教導長者點樣使用醫療券，又會加強監察有無濫用醫療券嘅情況。
陳肇始都承認醫療券係有不足之處，就係無法更有效咁去提升長者預防疾病嘅意識囉。至於將醫療券計劃擴展至六十至六十四歲人士，陳肇始就話政府都有其他醫療政策去幫助長者同埋市民，唔係淨係局限喺使用長者醫療券。